للأذكياء فقط.. فزورة كنيسة مارمينا!!

للأذكياء فقط.. فزورة كنيسة مارمينا!!







هاااااا.. عرفت مين اللي ورا الأحداث دي؟!!









مسيحية أسلمت.. عادي



دخلت الكنيسة بعد إسلامها.. عادي برضه!!



ذهب وفد من المنطقة السكنية المحيطة بالكنيسة؛ للتفاوض مع قساوستها لمعرفة وضع تلك التي أسلمت.. طب وإيه يعني!!


في هذا الوقت التفّ ناس حول الكنيسة، وبدأوا يرشقونها بالحجارة.. ليييييييييه كده؟!!



فقام شباب الكنيسة بتبادلهم بالرشق.. لأ كده الموضوع كِبر أوي!!



بعدها -وغير معروف السبب- تحوّلت الحجارة إلى قنابل
مولوتوف، وبعد قليل تبادل لإطلاق النار من أسطح المنازل المحيطة بمنطقة
الكنيسة.. والله ما عارف أعلّق وأقول إيه؟؟؟

انتشرت الأخبار في كل جهة بأن تبادل إطلاق النار يتم بين سلفيين وشباب مسيحيين!!

أليس ما سبق هو ملخص للسيناريوهات المختلفة التي رُويت عن حادث كنيسة
مارمينا بإمبابة؟ ألم تلاحظ شيئًا في تسلسل الأحداث؟ أليست هذه الأحداث
بتسلسلها شبيهة بأحداث سابقة مع اختلاف الأسباب؟ ألا تلاحظ أنه في كل
الأحداث ترد الأخبار بأن المعركة تدور بين سلفيين ومسيحيين؟ ألا تلاحظ أن
كل الأحداث الشبيهة بحادث كنيسة مارمينا يبدأ فيها التراشق بالحجارة ثم
التراشق بقنابل الملوتوف ثم تبادل لإطلاق النار؟

هاااا.. فكّر شوية.. تسلسل الأحداث.. هذا التسلسل لم يُذكّرك بشيء؟ لو
عرفت تبقى ذكي.. وأنا متأكّد إنك ذكي جدًا؛ لأنك باختصار شديد.... أنت
مصري..

طب هابسّطها لك..

فاكر أيام ثورة 25 يناير؟!!

فاكر يوم الأربعاء 2 فبراير 2011؟!!

أيوه.. تمام هو زي ما إنت قلت كده.. اليوم بتاع "معركة الجمل".. أو يوم "الأربعاء الدامي"..

طب افتكر معايا هو إيه اللي حصل فيه..

سيبك من موضوع اقتحام الميدان من قبل بلطجية يمتطون جمالاً وخيولاً.. أنا قصدي إيه اللي حصل بعد كده؟!!

مش الموضوع بدأ بناس كانت مؤيّدة لمبارك، بعد كده الناس دي بدأت ترشق
حجارة ورُخام على الثوّار في ميدان التحرير... وبعد كده بقليل تحوّلت
الحجارة إلى قنابل مولوتوف.. بعد كده اتحوّل المولوتوف لضرب نار من على
أسطح العمارات السكنية المحيطة بالميدان وأحد الفنادق القريبة من الميدان..
وأدّى ذلك إلى استشهاد أبطال الثورة.. وإصابة أعداد كثيرة.. مش هو ده اللي
حصل؟!!

هاااا عرفت الحل؟!!

باختصار.. وعلشان ماطوّلش عليك.. مش فيه تشابه شديد بين أحداث يوم
الأربعاء الدامي بميدان التحرير مع أحداث كنيسة مارمينا بإمبابة؟!! وكنيسة
صول بأطفيح وكل أحداث الفتنة الطائفية التي أعقبت ثورة 25 يناير؟!!

طب إحنا عرفنا تقريبا مين اللي كانوا مسلّطين البلطجية يعملوا كده يوم
الأربعاء الدامي في ميدان التحرير.. وهما دلوقتي قدام القضاء.. وعرفنا برضه
إنهم عملوا كده علشان كانوا عايزين الثورة تفشل.. ويستمر نظام مبارك في
حكم البلد وسرقتها ونهبها؛ علشان هما مستفيدين طبعًا من السرقة والنهب ده!!

وبكده.. أكيد عرفنا برضه مين اللي كانوا مخططين ومدبرين لأحداث امبارح
قدام كنيسة مارمينا.. وكل الأحداث اللي زيّها.. وأكيد كمان عرفنا هو غرضهم
من ده.

وأفكّرك بكلمة مبارك قبل ما يتنحّى: "عليكم الاختيار بين الفوضى والأمن".

هاااااا.. عرفت مين اللي ورا الأحداث دي؟!!

احب اقول للاخ اللى بيقول تسعه مسلمين ماتو وثلاثه مسيحين قول كلمه حق لسه
فى ناس بتتطهد الناس حتى فى الكلام انا لو عديتا لك شوف من امتى فى فتنه
وياريت كلنا نقول كلمه حق ونبطل بقى ندارى خيبتنا ايوه فى فتنه ومن الداخل
ومن السلفين اول ناس ومن الجاله اول حاجه بيت ربنا مافهوس سلاح والمسيحيين
اكثر ناس عاشوا فى اطهاد وظلم شوفنا فيوم طلعوا حرقوا جامع ولا قتلوا حد
ابدا كل مشكله تجليهم عن طريق حته كذبه وتاليف قصه ويلبسوهالهم عشان يضربوا
الكنايس خلاص بقت معروفه عندكم مذبحه الزاويه الحمرا من سنه 75 لحد يومنا
هادا كم مسيحى انقتل عن طريق ناس جهله متطرفين ومن شيوخ جهالين يطلعوا يوم
الخطب يهيجوا الدنيا مذبحه الكشح وضرب دير ابو فانا ونجع حمادى وغيرها
وغيرها كثير وكل اللى كان يقتلوا المسيحين لم باخد يوم واحد سجن ويكون طليق
وحر السالفيين اللى ما عندهم لا ذمه ولا ضمير ولا يعرفوا ربنا طلعوا
بمظاهرات ضد البابا شنوده مع انه رجل متفهم ومتسامح وبكل حوارته بيهدى
المواقف ولا عمره طلع من فمه كلمه وحده غلط ضد حد وقوموا الدنيا على اللى
اسمها كامليا وفى الاخر طلعت فى التلفزيون وقالت انها لم تسلم ومازالت
مسيحيه ومفتى الازهر اكد هاذا الكلام وسليم العوا والكل اكد ان مافى حد
باسم كامليا جت واسلمت ورغم كده نازلين فى حرق وضرب الكنايس ومصممين على
كذبهم وللاسف الجاهلين بيمشوا ورا السالفيين وغيرهم من بعض الشيوخ الضاله
تركوا كامليا الفوا قصه تانيه وحنفضل كده لحد امتى يا مسلمين مصر نمشى ورا
جاهلين وربنا عامى قلوبهم واعينهم كفايه ظلم وافترا يا عالم نفسى واحد
يطلع على المخروب التلفزيون ويقول كلمه حق للمسيحيين اللى مطهدين فى بلادهم
اذا احنا حنكذب ونخبى الحقيقه حنروح فين من ربنا يوم الحساب فوقوا اعرفوا
عدائنا من داخل البلد وهم الفئه المتطرفه اللى حتغرق البلد وارجوا من
الناشر ينشر التعليق لانه مهم جدا

فقام شباب الكنيسة بتبادلهم بالرشق.. لأ كده الموضوع كِبر أوي!!
بذمتك دة كلام واحد عاقل...وشباب الكنيسة طبعا مجانين.??!! من نفسهم
لقوا نفسهم فاضين..فقالوا يلا نتسلا...وكل مرة شباب الكنيسة هو
السبب..ارجوا من كاتب المقال ان يتقى اللة فى كتاباتة ...لانة هو وامثالة
لهم الفضل لما وصلنا الية من تخلف وهمجية و غوغائية نتيجة نشرمعلومات
مغلوطة واكاذيب يتلقفها الجهلة وانصاف المتعلمين والمتعصبين بمزيد من
التعصب والكراهية ونبذ الاخر..

بدايةً أشكرك عزيزي القارئ بالاهتمام وقراءة الموضوع
لكن أود أن أبين لك أنه جانبك الصواب في سرعة اتهامي بتشويه المعلومات..
لأنك ببساطة بترت جزء من المقال...واتهمتني به.. رجاء قراءة السطر السابق
للسطر الذي اسشتهدت به ...
"التفّ ناس حول الكنيسة، وبدأوا يرشقونها بالحجارة.. ليييييييييه كده؟!!
فقام شباب الكنيسة بتبادلهم بالرشق.. لأ كده الموضوع كِبر أوي!!"
يعني هنا أوضحت أن شباب الكنيسة كان رد فعل منهم... ولم أبين أنهم من بدئوا كما اتهمتني..
أشكرك لاهتمامك.. وأرجوا منك قراءة المقال وحدة واحدة لتتمكن من فهم محتواه .. وانتظر منك المزيد من التواصل ..
تحياتي

السلام عليكم
الاخ اللى قاعد يفتى ويقول جوزها راح يجيب مراته من الكنيسة عشان اعرفك انك
واللى زيك كدابين وبتسخنوا الناس على الفاضى اعرف حضرتك ان موقع اسلامى
طلع عبير نفسها تقول ياسين ده مش جوزها ده واحد كان بيساعدها وقعدت تقول
كلام فاضى كده كتيير عشان كده بقول لحضرتك وانت كاتب تعليق كبير قوى كده
بلاش تالف وتشتغلوا خلق الله واللى يقول معلومة يبقى متاكد منها وبلاش افتى
وحضرتك بتحكى الحكاية كانك كنت موجود الناس تروح تتجمع ليه ادام كنيسة
لاخونا المسيحيين عشان مافيش قانون عشان مافيش امن انا لو من الامن امسح
بكرامة اى حد يجيب سيرة كاميليا وعبير دى الارض كل شوية واحد يطلعلنا واحدة
تقول انا محبوسة فى الكنيسة نجرى وراه زى الهبل نحرق الكنيسة وفى الاخر
ميطلعش فى حاجة بالله عليك انت وعيرك احنا مش ناس هبلة ماشيين على الرايجة
يا راجل اتقول الله فى مصر اهى هتولع ويجبلكم الامريكان والاسرائليين
ينظموكم

طب والله فى بداية الموضوع انا جه فى تفكيرى نفس اللى الاستاذ كاتب الموضوع قاله..
فعلا نفس التشابه فى كل شىء مع اختلاف الاسباب

هى كل اى حاجه تحصل يبأه فلول وفلافل النظام وبقايا الحزب وهلم جرة
ياريت نبطل نعلق كل عيوبنا ومصايبنا على اى سبب والسلام علشان نريح
ضميرنا... الافضل بدل ماسيادتك عمال توجه تفكيرنا بأسلوبك العظيم وكلامك
الجليل تواجه الناس بعيوبنا او تساعدنا نشوفها من غير تزويق علشان نعرف
نصلح من حالنا مش كل مصيبه تحصل فى البلد يبأه احنا براءه وفل وزى النسمه
وياخواتى على رقتنا وبرائتنا والنظام الوحش الشرير هو اللى ضرب البمبه واكل
الجبنه وهد العشه على الكتاكيت
ياعم احنا مش ملايكه احنا كلنا عيوب وماصدقنا نلاقى ستارة ندارى وراها علشان نكشف عيوبنا ونرميها على غيرنا

قال صلى الله علية وسلم "من آذى ذميا كنت حجيجة يوم القيامه" صدق رسول الله

بسم الله الرحمن الرحيم "مَنْ أَحْيَاهَا فَكَأَنَّمَا أَحْيَا النَّاسَ
جَمِيعًا" صدق الله العظيم من منا يستطيع ان يسأل عن دم قطة اوكلب او حتى
حيوان كيف وقد اخبرنا رسول الله ان امرأة دخلت النار فى قطه وهى امرأة
صوامه قوامة كيف يستطيع الانسان المسلم ان يسئل عن دم مسيحى

كل دة عشان 15 /5 وفلسطين يجماعة خدو باللكم عيزن نفوق ونتحد ونصفى
النفوس بنا عشان نشوف حقنة الى ضايع مشكلتنة الجهل يريت الى فاهم يفهم الى
مش فاهم واحنة حنعيش مرحين بجد انتى ماشى فى الشارع لو لقيت واحد مش فاهم
الى حاجة مدام عندك وقت حول تفهمو لو فهمو ع قدو بسطهلو باى شكل صحيح
وفهمو حقو اية ويطالب بية ازى

كل دة عشان 15 /5 وفلسطين يجماعة خدو باللكم عيزن نفوق ونتحد ونصفى
النفوس بنا عشان نشوف حقنة الى ضايع مشكلتنة الجهل يريت الى فاهم يفهم الى
مش فاهم واحنة حنعيش مرحين بجد انتى ماشى فى الشارع لو لقيت واحد مش فاهم
الى حاجة مدام عندك وقت حول تفهمو لو فهمو ع قدو بسطهلو باى شكل صحيح
وفهمو حقو اية ويطالب بية ازى اخوكم احمد الحداد

والنبي يجماعة عاوزين نفوق بقا كفاية كل شوية يضحك علينا امبارح كانت
كاميليا وطلعت ظبتت الحوار وقالت انا لسا مسيحية .منفعتش القصة دي قام
واحدة تانية اسمها عبير قصة جديدة .طب وبعدين وبعدين كانت فين قصة مسيحي
ومسلم دي واشمعنا طلعت دلوقتي . يجماعة ساء كانت من تخطيط اجنبي او تخطيط
من جوا النظام السابق مش قضيتنا احنا لازم ننتبه وندرك ان دي قصة وبتتلعب
علينا هدفها تفرقتنا . كفاية بقا نفووووووووووووووووووووووق

طيب ومحدش خد بالوا كمان ان الموضوع ده حصل بعد اعلان الحكم على العادلى ب 12 سنة سجن !!!!!!!!!!!!!!

الفئة القليلة فى البلد دى, مين يا بتاع الفوازير ؟
الفئة اللى من سنين فى ناس عايزين يصوروهم على انهم الفئة المستضعفة, و
الفئة صاحبة النصيب الأقل, و الفئة اللى محتاجة حماية خارجية, يعنى من
الآخر الفئة اللى عايزين الغريب يحتل مصر بمعنى الكلمة عشانها ؟ فتحو
عقولكم .. مين من مصلحته ان الغرب يتحكم فى مصر و يكون ليه فيها كلمة ؟؟
مين أقوى فئة مؤثرة وسط المصريين ؟ و مين اللى يهمه انهم ميطلعلهمش صوت ؟
مين اللى فعلا بيخاف منهم و بيحاول دايما يشوه صورتهم ؟ و مين اللى دايما
بيحاول يحسس الفئة القليلة فى البلد انهم فى خطر منهم و انهم لازم يأمنو
نفسهم باللجوء لحماية الغرب ؟ لو فكرتو شوية هتوصلو للإجابة ..
يا بتاع الفوازير .. لو علقناها على مبارك واللى تبعه, او على الاخوان او
السلفيين او المسيحيين, نبقى بنزيد النار حطب .. و بنشعللها اكتر و اكتر ..
بلدنا ليها اعداء براها اكتر من جواها ! اصحو بأة و بطلو خناق فى بعض و
اقفو كلكم مع بعض ضد فتنة بتاكل البلد أكل و هتضيع كل اللى فات و كل اللى
جاى !

ياناس دا كذا مرة يعتدوا على الكنايس بدون سبب وضرب المسيحين بدون سبب تفسر ده كله بى ايه ؟
هو ده الاسلام ؟ هو ده دين الاسلام ؟ هو ده تعليم الاسلام ؟ هى دى مبادئ الاسلام واخلاقه ؟

ياجماعة بلاش نشبة التحرير بالى حصل فى موضوع الكنيسة وبلاش نعلق فشلنا على
شماعة حد تانى ياريت ونركز شويا علشان احنا تعبنا من الا بيحصل فى البلد
علشان والله احنا ما نعرفش يعنى اية حرية ويعنى اية ثورة احنا الانعرفه بس
هى الهمجية

ياجماعة بلاش نشبة التحرير بالى حصل فى موضوع الكنيسة وبلاش نعلق فشلنا على
شماعة حد تانى ياريت ونركز شويا علشان احنا تعبنا من الا بيحصل فى البلد
علشان والله احنا ما نعرفش يعنى اية حرية ويعنى اية ثورة احنا الانعرفه بس
هى الهمجية

كل المشكلات التى تعاني منها مصر الان هي نتاج ميراث هائل من الجهل والتخلف
وغياب التعليم والعلم من كل مؤسئسات الدولة مثل المدارس والجماعات
والمساجد والكنائس .
غياب الوعي والثقافة عن الناس هو الذي يؤدي الى تصديق الشائعات
والانسياق للعنف .
تخلي الافراد عن ايه مصلحةشخصية والانشغال بهموم ومصلحة الوطن هي الحل للخروج من الازمة
الاهتمام بالتعليم وان تكون الحصة الاولى في المدارس والكلمة الاولى في اول
محاضرة بالجامعات عن حب الوطن والتعامل مع الناس والاخلاق هي الخطوة
الاولى للنهوض بمصر اقتصاديا واجتماعيا
انها مسئولية كل فرد امام الله عزوجل (كل اب /اخ / زوج/مدرس/شيخ/قسيس/مدرب /
اي انسان يستطيع التوجة بالنصيحة والموعظة الحسنة للاخرين
وكفانا مسكنات ومهدئات

الشباب يموتوا ف التحرير علشان نعيش احنا ونخرب ف البلاد يا ناس سواء فلول
الحزب الواطى او غيرهم افتكرو حساب المالك والوقوف بين يديه عز وجل انا اعز
اصدقائى مسحيين

والله انا احترت بس النا متاكدة منو ان مفيش بنى ادم سوى يعمل الحصل دا
لانو مش هيموت ااقباط بس لا اساسا انا رأى ان الحصل دا لا فى مصلحة
المسلمين ولا المسيحين حرام كفايةب قى احنا اتخنقنا خنقات وضرب وزفت والله
اعلم الهيحصل بعد كدا ربنا يرحمنا برحمتو

طيب نفكر بالراحة امتى ظهرت المسلمين و المسحيين ايد واحدة بعد 1/1/2011
السلفيين مش عايزيين الحكم و يظن بعض المسحيين انهم مكروهيين و دة مش صح
طيب ايام حكم مبارك كان يقدر واحد مسلم يضرب مسيحى لا علشان يترحل امن
دول
بس كشعب لكم دينكم و ليا ديين دة مش صح احنا عادى هما اللي مش عادى

عليها بصمات فلول امن الدولة

اللعبة اركانها اتعرفت وشعب مصر الذي اثبت وعيه السياسي عرف مين اللى وراها

اللهم من اراد لبلدنا هذا شرا اللهم فانتقم منه واجعل كيده في نحره و وحد
صفوف المصريين مسلمين ومسيحيين وأدم علينا سترك وأمنك وأجعلنا اخوانا
متحدين والف بين قلوبنا ,اللهم كل من اراد بالاسلام سوءا فرده عليه وانصر
اسلامنا....آمين
أتي الاسلام غريبا ...وسيعود غريبا ...فطوبي للغرباء