موضوع: انت معقد و خنيق!!!!......... (حزب مقاومة التفاهة الشعبي) الأربعاء مارس 25, 2009 8:50 am
انت معقد و خنيق!!!!......... (حزب مقاومة التفاهة الشعبي)
جملة جابتلي ضغط و شلل نصفي و رباعي و كلي...
و إنشاء الله، إنشاء الله، إنشاء الله، هاتجيبلي سرطان في المخ! يلا ماهو بناقص البلاوي بقى كلها، يعني هي جت على دي!
بصراحة بقى انا جاي النهاردة احرق دمكم...!!!
عادي يعني ما انتوا دايمين متعودين على كدة مني...
كل شوية لازم اجدد نشاطي الحارق للدماء لكل الزباين بمواضيع تفور الدم !
اي بني آدم دلوقتي، بيكون عنده اي ميول ثقافية مبدأئية، او زوق زواق للموسيقى و الأفلام، او حتى المسرحيات و المسلسلات...
تبص تلاقيه محط تريقة و تهريج و إستفزاز من الجميع...!!
ليه؟؟ ماتعرفش!!!
و العيب اكيد موش فيه و لا ممكن يكون فيه، لأن موش عيب يكون ليك زوقك الخاص، و محاولتك لتثقيف نفسك بنفسك، لأن ببساطة العيب في الناس اللي حواليك، اللي بيعبوا على الزمن و غدره بيهم و بمجتمعهم، فحين ان الزمن مالهوش عيب غيرهم و غير جهلهم و تخلفهم...!!!لا وموش بس كدة !
حتى هواياتك الخاصة، لازم تلاقي اللي بيسخر منها بدون اي داعي و بشكل تجريحي واضح !
و كأنك ماكينة بتؤدي غرضها المعين و المحدد، و بعد كدة بكل بساطة، تتكهن على اي تربه !
موش من حقك حتى يكون ليك هواياتك في مجتمع مابيعترفش بالإحترام لخصوصيات ألأخرين و التقدير لهواياتهم !
و كان الدنيا بقى عليها السلام خلاص !
مجتمع لا بيحترم محاولة الإنسان لتثقيف نفسه، و لا حتى خصوصياته و هواياته الخاصه !
و هانبعد بعيد ليه ؟ ماهو المثال قدام حضراتكم اهو...
العبد لله كدة و العن مليون مرة من كدة !
انا ببساطة شاب عادي زيي زي كل شاب، و بعمل كل حاجة بيعملها اي شاب عادي، بخرج و بروح و بتفسح و باجي مع اصحابي و زمايلي، و بمارس حياتي الطبيعية، و ليا اصدقائي اللي بتناقش معاهم في كل حاجة، و ليا اصدقائي اللي مابيحبوش يتكلموا في المواضيع الساخنه اللي فيها نقاش ساخن، و بيحبوا الضحك و الهزار و الفرفشه...!!!
لكن موش دي القضية، القضية ببساطة هو رد فعل بعض الناس ناحية فكري و إهتماماتي و ثقافتي...
من ابسط الأمثلة، لما بشوف ناس من الحلوين اياهم، بيشفوني و انا منهمك في قراءة كتاب في البيت او فى الشغل عندى
(و انا بعترف اني موش حريت كتب اوي ولا راجل بياكل الكتب اكل، لكن لما بشوف حاجة بتعجبني بقعد اقراها بس بردو ماليش صبر اوي، لكن بحاول اقراها للآخر)
تبص تلاقي نظرات الإستخفاف و الإستغراب نازلين مع بعضيهم على التوازي على راي حلمي !
لا و ياسلام بقى، لما تبقى قاعد كدة لا بيك و لا عليك، و بتستعمل الاب توب علشان تخش عن الويرلس لموقع معلومات يخص موسوعة عن التاريخ او الحروب، و تقعد تقرا فيه، و لما حد يعدي من جنبك او يقف يشوف انت بتعمل ايه، ممكن يستغرب اوي و يقولك انت معقدها اوي كدة ليه ؟؟؟
طيب ايه التعقيد موش فاهم يعني في كدة ؟
موش عيب اظن ابدا ان الواحد يثقف نفسه، او يقرا تاريخ اللي سبقوه من امم و حضرات، لأنه لازم هايستفاد منها في حياته العملية...
التاريخ اتعمل اساسا علشان كدة، موش علشان نتباهى بيه و خلاص !
اتعمل علشان نستفيد من تجارب اللي سبقونا، موش علشان نقول على نفسنا إحنا و إحنا و إحنا !
و ياسلام بقى كمان، لو كنت واقف بتناقش مع زمايلي في قضية سياسية زي عادتي، او بتكلم معاهم في حدث سياسي مهم يخص امن و مستقبل البلد القومي...
تبص تلاقي الناس بتنظرلك من حواليك نظرت إستغراب و احيان كتيرة اوي نظرة سخرية !
ليه ؟؟؟
هو الوعي بقى عيب ؟
لا و التهمة المستهدفة من الأسلوب ده دايما بتبقى...
انت عيل معقد و خنيق...!!!
حتى في الإحترام للزوق الفني لأي شخص او في الهوايات الخاصة لأي مخلوق !
انا مثلا، من هواياتي النت..
بعيد عنكم اعتبروني بعاني من الوحده، و الفراغ الفظيع، و محتاج حد يونسني ناس احس انهم بيحبونى بجد ، علشان كدة بحب النت و خصوصا المنتدى بتاعى دة وكام شات كدة اللى ليا منهم صحاب بجد !!!
مافيش داعي لتخبيط راسك في الحيط، هاقولك مثل كمان..
انا مثلا بحب اتفرج على انواع معينة من الأفلام، و في نفس الوقت بشوف كل ألأفلام، يعني لما بحب اتفرج على ألأنواع المعينة بتكون الأنواع المفضلة، لكن بتفرج على كله...
لو جيت اناقش حد اي حد، في اي فيلم من افلام المقاولات بتاعت لحم الحمير و (السبكي)، وخصوصا لو من نوعية البشر امثال اللمبي و اتباعه، تلاقيه بيقول بردو نفس الجملة...
انت معقد، و خنيق...!!!
و ياسلام بقى...!!!
ياسلام بقى لو قاعد بتتفرج على فيلم كلاسيكي، او حتى فيلم جديد، وليه قصه و مضمون و رمزية مايفهمهاش غير اللي بيفهم و بس...
تلاقيه بردو نفس نظرات التريقة و مصمصة الشفايف نازلة عليك و على زوقك العفش ...(من وجهة نظر الناس طبعا!)
و يا سلام بقى...
بقى لو طلبت معاك انك تسمع مزيكا هادية، لو انت راجل زواقة و سميع و بتسمع امل بقي لو بتسمع ام كلثوم ولا فيروز ولا حليم ووردة ونجاة
يلهوى هيقولو عندك دقه قديمة كيك
تموت فى التقليد انا ياجماعة بحب التقليد ماحدش لية دعوة بموت فى التقليد والقديم انا
واحب كمان واموت واكون (مجنون كلاسيك غربي زي حالاتي)...
تلاقي نظرات ألإستغراب و الإستعجاب، ثم تتحول إلى الإشفاق و مصمصة الشفايف!
و في النهاية تسمع الجملة الشهيرة... انت عيل معقد، و خنيق...!!!
كلن...
بس ارجع و اقولك بردو العيب موش فيك، لو بيحصلك نفس اللي بيحصلي، لأن لا عيب انك تقرى، ولاعيب انك تثقف نفسك ولا عيب حتى يكون ليك وعي و فكر سياسي، ولا حتى العيب ان يكون ليك زوق و هوايات...
آهـٌ‘ـلآ وسـٌ‘ـهـٌ‘ـلآ بـكـم فـى مـنـتـديـآت 
انت معقد و خنيق!!!!......... (حزب مقاومة التفاهة الشعبي)
