"مدمن" يعني حتى ماحبش نفسه.. طيب إزاي هيراعي ربنا فيكِ؟! 
حبيبي بقى إنسان تاني ومع الأسف مش بيصلّي وبياخد مواد مخدرة
أنا حابة إني أحكي مشكلتي.. أنا بحب إنسان
أوي، أكتر من نفسي وأكتر من أي حاجة في الدنيا؛ بس كانت بتحصل بينّا مشاكل
كتير؛ بسبب إني دايماً كنت باغير عليه وباشكّ فيه كتير؛ بس الشك ده مش من
فراغ؛ لأن طبيعة شغله والمكان اللي بيدرس فيه، فيه بنات كتير، وكان دايماً
بيبقى waiting، ولما باسأله يقول لي: ده واحد صاحبي، وأنا طبعاً ماصدقتهوش،
وكمان غير كده طريقته معايا في الكلام وعدم اهتمامه، كل ده كان بيخليني
أشكّ؛ مع إني ممكن أكون واثقة إنه بيحبني.
ومرة كان متقدم لي عريس،
وكنت متضايقة إن الموضوع بدأ يدخل في الجد، وقلت له؛ فزعل مني.. آخر مرة
أختي كلّمته، قال لها: إنه متضايق مني أوي وإنه بيحبني أوي؛ بس مابقاش قادر
يكمل معايا.. وأنا من يومها وأنا مش عارف أركّز في دراستي ولا عارفة أعمل
حاجة في حياتي، وتعبانة أوي من غيره؛ لدرجة إني أوقات كتير بافكر إني أموّت
نفسي.
وفي الفترة الأخيرة خليت واحدة قريبتي تكلّمه علشان أشوفه
عامل إيه في حياته؛ بس هو مايعرفش إن اللي كلمته تبقى قريبتي.. لقيته
اتغير، وبقى إنسان تاني ومع الأسف مش بيصلّي، وبياخد مواد مخدرة، وده كان
واضح من كلامه معاها.. هو يمكن كان كده لما عرفته؛ بس ده كان بسبب أهله
ومشاكل في حياته، ويمكن أصحابه مش كويسين.. وأنا كنت غيّرته وخلّيته إنسان
تاني؛ لكنه رجع لطريق الغلط تاني.
نفسي أرجع أكلّمه تاني؛ لأني بجد
خايفة عليه وعلى طريقة حياته اللي غيّرها، وصعبان عليّ أوي؛ بس مش عايزة
أكلمه بعد ما باعني في لحظة وقال إنه مش قادر يكمّل معايا، وما حاولش بعدها
يكلمني أو فكّر إنه يرجع لي.
أنا بجد مش عارفة أعمل إيه؛ أرجع أكلمه؟ وأقول له إيه؟ أو أحاول أغيره إزاي؟ ولا أتخلى عن أكتر إنسان حبيته؟
htfdal.fialbyصديقتي العزيزة، في البداية عليك الهدوء عشان تقدري تفكري وتفهمي كلامي كويس.
لازم
تعرفي إن الغيرة دي صفة موجودة في كل إنسان؛ سواء رجل أو امرأة؛ لكن فيه
غيرة بتكون من غير أسباب وبتكون غيرة مَرَضية، وبتؤدي لفشل أي علاقة في
الدنيا.
مش من حقك إن تغيري عليه عشان بيشتغل في مكان فيه بنات؛
لأنك إنتِ كمان ممكن تشتغلي في مكان فيه رجالة، أو بتدرسي في مكان فيه
أولاد، وبتنزلي الشارع، وأكيد الناس بتشوفك.
صديقتي من الواضح من كلامك إن ثقتك في نفسك قليلة، أو ثقتك فيه قليلة، أو عدم ارتباطكما رسمياً هو السبب في القلق ده.
تعالي نتكلم في الأول عنك، ليه ثقتك في نفسك قليلة؟ وليه حاسة إنه ممكن يكلم واحدة تانية أو حتى يعجب بيها؟
عيزاكِ
تفهمي إن الثقة في النفس مش بس بتيجي من الجمال؛ لكن بتيجي من حاجات تانية
كتير زي: التفوّق في الدراسة، ونجاحك في العمل، والتعامل مع الأشخاص،
والشخصية المحترمة المتدينة، وحسن التعامل مع الناس.. وعايزاكِ تكوني واثقة
إنه لو عرف واحدة تانية وإنتِ معاه، يبقى في الحالة دي إنتِ اللي كسبانة؛
لأنك عرفتِ حقيقة هذا الشخص.
في حين إنك لو ماكنتيش شُفتِ منه حاجة
في الفترة اللي كان معاكِ فيها؛ واللي عندك هو مجرد غيرة بدون أسباب، في
الحالة دي فالعيب فيكِ إنتِ.. وعلى فكرة الراجل لو لفتّي انتباهه إنك
بتغيري عليه كتير وبدون أسباب؛ هتلاقيه من نفسه بيحاول إنه يخليكِ تغيري
عليه أكتر، ولو إنتِ فعلاً ذكية ماتديش أي اهتمام لكلامه، وتاخديه على أساس
إنه هزار؛ إلا في حالة إنك تكوني متأكدة وواثقة إنه فعلاً بيعمل حاجة
إنتِ ماتعرفيهاش.
صديقتي، مع الأسف كل كلامي معاكِ مجرد نصائح
لمستقبلك فقط، وإن الصفات دي تكون في شخصيتك بعد كده إن شاء الله؛ لكن مش
عشان تصلّحي علاقتك مع هذا الشخص.. في بداية رسالتك كنت شايفة إنك فتاة
غيورة وبتشكّي فيه بدون أسباب، وعلى فكرة دي أسباب كافية إنه يسيبك عشانها؛
لأنك لو كنتِ مكانه وحسيتِ إنه بيشكّ فيكِ -خاصة لو إنتِ مش بتعملي حاجة
غلط- ساعتها مش هتقدري تكمّلي عمرك وحياتك مع شخصية شكاكة.
وفي
نهاية رسالتك اتكلمتي عن إنه اتغير، وبدأ ياخد مواد مخدرة، وترك الصلاة
اللي هي عماد الدين، وكمان أصدقاء السوء، وزادت مفاجأتي لما وجدتك عايزة
تقول لي إنه كان كده قبل ما تعرفيه!!
إزاي تأمني على نفسك مع شخص
ابتعد عن الله سبحانه وتعالى، وذهب إلى هذا الطريق؟! تفتكري هيراعي مين
فيكِ؟ ربنا؟ طيب إزاي وهو ابتعد عن الله سبحانه وتعالى؟
صديقتي
ماحدش بيغير من حد، لازم تعرفي كده كويس أوي، وحتى لو إنتِ كنتِ سبب إنه
يكون كويس؛ فالمفروض إنه يستمرّ على كده؛ حتى لو ماكانش فيه نصيب بينكم؛
لكن مع الأسف ده ماحصلش؛ لأنه كان تغيير وقتي، وربنا قال في سورة الرعد:
{إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ} صدق الله العظيم.
عزيزتي
عليك الابتعاد عنه تماماً والتركيز في دراستك، والصلاة والدعاء، والتقرب
من الله سبحانه وتعالى، واعلمي تماماً إنك هتاخدي نصيبك، وإن اللي جاي
هيكون أحسن إن شاء الله.
لو عايز تفضفض لنا دوس هنا
آهـٌ‘ـلآ وسـٌ‘ـهـٌ‘ـلآ بـكـم فـى مـنـتـديـآت 
