لا صانك ولا حافظ عليكي.. لو حبيبته بجد مش ممكن كان هيخدعك ويغدر بيكي

لا صانك ولا حافظ عليكي.. لو حبيبته بجد مش ممكن كان هيخدعك ويغدر بيكي







لما واجهته قال لي إن إحنا لو ارتبطنا ببعض علاقتنا هتفشل








السلام عليكم ورحمة الله وبركاته، أولا أنا عايزة أشكركم على الموقع الجميل ده بجد ربنا يوفقكم.

ثانيا اللي هي مشكلتي، أنا بنت سني 26 سنة، درست معهد عالي،
كنت مرتبطة بحد معايا من المعهد على أساس إنه جواز، وانفصلت عنه لأسباب
خاصة بيه وبشخصيته.

بعدها قعدت في البيت وما اشتغلتش، وأنا على النتّ في مرة
اتعرفت على واحد جارنا بالصدفة، هو دكتور، العلاقة بدأت صداقة، حكى لي على
كل حاجة في حياته، بصراحة هو كان يظهر من بعيد إنه إنسان مؤدب وعنده
أخلاق، لكن لما قرّبت منه مالقيتش غير كل حاجة مش كويسة، وقال لي إن ده
عادي، وإن معظم الدكاترة كده، كبّرت دماغي والصداقة اتحوّلت لحب شديد، وهو
طلب إني أسامحه على الأيام اللي عدّت، وأنا قلت له إنها مش مأثرة معايا في
حاجة، وحكيت له عن كل اللي فات من ماضي..

اتطورت بيننا العلاقة جدا لدرجة إنه بقى اللي كان بيعمله مع
الناس اللي قبلي بقينا بنعمله مع بعض بس بحدود، وبعدين فتحنا موضوع الجواز
قال لي إنه بيحبني جدا وإنه مايقدرش يتجوزني؛ لأن أهله في البيت هيرفضوا
لأسباب عائلية ما بيننا وما بينهم.

سألت أهلي من غير ما يحسّوا بشيء قالوا إن مافيش أي أسباب
معروفة عندهم. لما واجهته قال لي إن إحنا لو ارتبطنا ببعض علاقتنا هتفشل
لأننا هنشكّ في بعض، وإنه سأل واحد صاحبه وحكى له على الأسباب أكّد له
الكلام، وقال له ماتقولّهاش علشان ماتنصدمش في حد.

ما اعرفش إن كان كذاب ولا لأ.. استمرينا شوية في علاقتنا على
أمل إنه يغيّر موقفه، لكن مافيش فايدة، رحت أخدت رأي ناس أنا أهمهم على
أساس أعرف إن الموضوع اتفتح في البيت عنده ولا لأ، عرفت إنه ما اتفتحش
ومافيش حدّ يعرف عن الموضوع حاجة، لما واجهته قال إنه ما فاتحش باباه؛ لأن
الأسباب دي معروفة، وهو عارف رد باباه كويس، جيت قلت له إنت بتحبني ولا
لأ؟ قال لي آه بحبك، قلت له موافق نكمل مع بعض ولا لأ؟ قال لي إنتي عارفة
إنه مش هينفع، قلت له يبقى انساني.

وبعدت عن حياته خالص، بس أنا عارفة إني غلطت لما جاريته في
اللي هو عايزه، وإني خليت ربنا يزعل مني، بس دلوقتي الحمد لله تبت وبادعي
دايما ربنا يسامحني، بس أنا عايزة أعرف هل أنا كنت لعبة في إيده، ولا كان
بيحبني ولا إيه بالظبط؟ الموضوع ده هيجنني أرجو إنكم تدلّوني على حاجة
تريحني.


lolo


لو عايز تفضفض لنا دوس هنا