لا للصـحوبــية X __X

سبتها او سبتيه .. وبجد تعبان / ـه ومش عارف أعمل أيه ؟؟؟

(( انا بحبو/ها ومقدرش اعيش من غيرو/هـا ))

بصوا يا جماعه أنا عارفة أن الموضوع بجد صعب وفيه مشقة جامدة أوي
...
صعب أن الإنسان يبعد عن الشخص اللي بيحبه .. وده لأنه أتعود عليه فى حياته واتعود على أنه لما يصحى يكلمه ويسمع صوته .. ولو دخل ينام يكلمه .. والكلام ده كله .........

بس والله لو عرفنا أن الخير فى ترك الشخص اللى إحنا بجد حبيناه .. هنعمل كده

يا جماعة إحنا لما بنثق فى دكتور .. مش بندى لنفسنا فرصة أن إحنا نشك لمجرد لحظه فى قدراته وبنسلم نفسنا ليه لأننا استشعرنا الأمان والطمأنينة تجاهه .. ووثقنا فى وعده بإنه هيعمل كل اللى يقدر عليه

طب ليه مش قادرين نثق فى وعد ربنا لينا ؟؟؟

ليه مش قادرين ندى نفسنا فرصه نرضى ربنا بجد .. ليه خلينا رضى الناس والسعى وراء شهواتنا هو همنا الكبير .. وسيبنا رضى رب العباد

والله يا جماعة قرآت آيه هزت كيانى كله واتمنيت ساعتها لو يتدبر معناها كل شاب وفتاة .. والله كانوا هيفهموا إن السعاده الحقيقيه فى طاعة الله والبعد عن ما يغضبه سبحانه وتعالى

والآيه دى فى سورة إبراهيم ..

يقول الله تعالى
ا((وَقَالَ الشَّيْطَانُ لَمَّا قُضِيَ الأَمْرُ إِنَّ اللّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلاَّ أَن دَعَوْتُكُمْ فَاسْتَجَبْتُمْ لِي فَلاَ تَلُومُونِي وَلُومُواْ أَنفُسَكُم مَّا أَنَاْ بِمُصْرِخِكُمْ وَمَا أَنتُمْ بِمُصْرِخِيَّ إِنِّي كَفَرْتُ بِمَآ أَشْرَكْتُمُونِ مِن قَبْلُ إِنَّ الظَّالِمِينَ لَهُمْ عَذَابٌ أَلِيمٌ ))ا(22) سورة إبراهيم

أنا عاوزة أقف وقفة صغيرة جدا مع الآيه دى

ا( لما قضي الأمر ).. يعنى خلاص يا جماعة أنتهى الأمر ...مبقاش فى كلمة: يارب أنا آسف .. مبقاش فى توبة .. مبقاش فى حد هيقول للتانى كده حرام وكده حلال

ا( إن الله وعدكم وعد الحق ) .. هنا بقى عاوزين نركز شويتين فى المعنى .. وعدكم الله وعد الحق .. للأسف يا جماعة إحنا فقدنا الثقة فى وعود الله لينا وصدقنا وعد الشيطان

وعدنا الله جل وعلا وقال من يتق الله يجعل له مخرجا )ا

وسيبنا وعد ربنا سبحانه وتعالى .. وخفنا نسيب اللى إحنا بنحبهم علشان (أستغفر الله) مش واثقين إن ربنا سبحانه وتعالى هيجعل لينا مخرج

وصدقنا كلام الشيطان لما قال لنا :

( مفيش جواز من غير صحوبية )

( لو سبتاها هتتجوز غيرك )

( وأنتي لو سبتيه هينساكى وهيشوف غيرك )

( يا بنتى أنتي هتعقدى نفسك ليه ما البنات معظمهم كده )

ا( وأنت يا بنى تقوى أيه و بتاع أيه عيش حياتك وكلمها علشان تدرس أخلاقها كويس )ا

ا( يا بنى سيبك من الناس اللى عمالة تقول سيبها علشان تكون ليك ومن نصيبك دى ناس فاهمة الدنيا غلط )ا

ا(يا بنتى خليكي معاه علشان مايبصش لواحدة تانية .. دا اللي بعيد عن العين بعيد عن القلب )ا

... و غيره ... و غيره ... و غيره ... وغيره

ورغم كل ده برده وثقنا فى وعد الشيطان لينا .. ونسينا إن الشيطان بنفسه هو اللى قال :

( ووعدتكم فأخلفتكم )

وعدتكم إنكم هتتجوزوا بعض .. وأنا كنت عارف إن كل مكالمة كانت بتبعدكم عن بعض

وعدتكم إنكم هتعيشوا فى سعادة .. وأنا كنت عارف إنكم هتعيشوا فى ضنك

وعدتكم إنكم هتكونوا متسامحين مع بعض وكل حاجه بينكم هتتحل .. ولكن مانسيتش إني أخلى حياتكم شقاء وخليت أتفه المشاكل سبب فى تعاستكم

وعدتكم إن السعاده فى مكالمة تليفون .. وخليتكم تنسوا ربنا السميع العليم

الشيطان هيقولكم يوم القيامة (بس بعد ما كل شئ هينتهي):

زى ماكنتم معايا فى الدنيا مطيعين وبتسمعوا كلامى .. فأنا جاى أحسركم وأعرفكم أنى من الأول كنت بضحك عليكم وبألعب بمشاعركم

أيوه كنت مخليك فاكر نفسك صح وأنت بتكلمها وبتتعرف عليها بحجة أنك بتدرس أخلاقها

وأنتى كمان كنت مخليكى مبسوطة أوى وأنتي كل يوم بترخصى نفسك علشان واحد وأقنعتك أنه هيكون ليكى وأنه بيحبك .. لكن أنا نسيت أقولك انك كل مكالمة كنتي بتكلميه فيها كنتى بترخصى فى قلبه أكتر وأكتر

ونسيت أقولك أنه غصب عنه من كتر ما حس أنك سهلة ومش قادرة تمنعى نفسك عنه .. كنت أنت أول واحدة بره حساباته يوم ما فكر يرتبط بجد ويتجوز واحدة هى فى يوم من الأيام هتكون زوجته وأم أولاده

لكن حبيت بس أتفرج عليكم وأفرح فيكم وأنتوا بتغضبوا ربنا وأنتم عمالين بتكذبوا كلامه ووعوده .. بس خلاص أنا عملت اللى أنا عاوزه وقدرت ألعب بمشاعركم وقدرت أعذبكم وأفرق بينكم للأبد

ا( وما كان لي عليكم من سلطان إلا أن دعوتكم فاستجبتم لي )ا

وعلى فكرة أنا ماضربتكش على أيديك لما مسكت تليفونك وكلمتها .. وأنا ماضربتكيش على أيديك لما خرجتى معاه وكلمتيه

أنا بس شاورتلكم وضحكت عليكم وقولتلكم إن طريق السعاده من هنا .. وأنتم بصراحة ماكدبتوش خبر وماخوفتوش علي نفسكم أصلا من عذاب ربنا

دا غير العذاب الأصغر ..... لا أنتوا عيشتوا وكملتوا حياتكم مع بعض !! ولا أنتوا قادرين تعيشوا مبسوطين مع حد تاني !!

آآآآآآآآآآآآآآآآآآآآآآآه من ده عذاب

وأنتوا اللي كتبتوا لنفسكم النهاية دي .. أنتوا اللي كتبتوا البعد والفراق الأبدي دا بأيديكم

أحبائى فى الله .. ليه نوصل للمرحلة دى ؟؟؟
وإحنا عارفين الحل فين

والله يا جماعه ماتخافوا
ماتخافش .. والله لو سبتها النهاردة هتجيلك وساعتها هتحس بجد بغلاوتها وقيمتها فى قلبك وهتحافظ عليها

وأنتي ماتخافيش هيجيلك والله هيجيلك .. وأرجوكى بلاش ترخصى نفسك عشان أنتى غالية أوى .. أرجوكى حافظى على نفسك وغلى نفسك

بالله عليكى لو فى جوهرة على جبل عالى وحاول شاب أنه يوصل للجوهرة دي .. حاول مره ووقع .. وحاول التانية ووقع تانى وأتجرح .. ووقع التالتة وأتكسر .. وبرده فضل مصر أنه يوصل للجوهرة دي .. وفى آخر المحاولات وصل بعد مشقة وعناء .. بالله عليكى ساعتها هيقدر يفرط فيها ؟؟؟

ساعتها هيجيلوا قلب أنه يسيبها لغيره ؟؟؟؟؟؟؟؟؟؟؟؟؟

بالظبط نفس الكلام

النهاردة أنتى لما تمنعى نفسك عن الشاب اللى بجد نفسك ترتبطى بيه .. صدقينى هتغلى جدا فى نظره .. كل يوم ربنا سبحانه وتعالى هيزيدك رفعة وقيمة فى قلبه

يابنتي قلبه دا بأيد ربنا .. يعني هو وحده سبحانه وتعالي اللي قادر يزرع في قلبه أنه يحبك أو يكرهك .. وإن شاء الله لما ربنا يجمع بينكم والله ما هيجيله قلب يزعلك وهيحافظ عليكى وهيحطك جوا عينيه .. لأنك بجد غالية .. غالية جدا

وتعالوا معايا نشوف الصورة التانية

لو هى هى نفس الجوهرة .. بس المرة دى مش على قمة جبل .. لأ .. دى مرمية فى الشارع وعليها تراب وكل اللى رايح واللى جاى
عمال يشوط فيها لحد ما واحد لقاها وأخدها

بالله عليكى هتكون غاليه عنده زى الشاب اللى تعب وبذل قصارى جهده عشان يوصل للجوهرة البعيدة اللي لسه بتلمع فوق الجبل !!!!ا

شوفتوا يا جماعة أد أيه الموضوع مش سهل

مش سهل أبدا أنك تمشيها غلط من الأول وتقول أنا بدور على السعادة .. مش سهل أبدا أنك تقول أنا عاوز أرضى ربنا وأنت كل يوم بتعصيه

يالا يا شباب ويا بنات بالله عليكم .. نسيب بعض عشان بجد نكون لبعض

ويلا يا رجالة بجد تكونوا رجالة .. يلا ناخد بأيد بعض للجنة ونساعد بعض فى أن إحنا نحب ربنا لأن حب ربنا هيعود علينا بالخير كله

ويالا يا بنات .. أنتى أرق من أنك تجرحى حياءك .. أنتي واحدة كلك حنان و رقة وطيبة .. كلك مشاعر جميلة ...

بلاش تدمرى حاجة بجد حلوة فيكى وهى مشاعرك وأحاسيسك وتفرطى فيها فى طريق يغضب ربنا وقوليها بأعلى صوتك .. قلبى ملك ربى وحبى لله أشد

النهاردة يا جماعة كل واحد يجعلها لله ويكلم الأنسانة اللي بيحبها ويقولها :

أنا والله لأني خايف عليكى ونفسى أرتبط بيكى فأنا لازم أسيبك .. وصدقينى أنا مش هرتبط بحد إلا بيكى وعمري ماهتخلي عنك ولا أفرط فيكي .. وصدقينى لو فيا خير ليكى هكون ليكى .. وإن شاء الله معادنا يوم ما أخبط علي بابكوا وأجي عشان أتقدملك ...

أستودعك الله الذي لا تضيع ودائعه
وتخيل بقى لما تبقي سايب أمانة مع ربنا

يااااااااااااااااااااااااااااااااه أمانة مع ربنا .. يعني ربنا هيحفظهالي من كل سوء ومش هبقي خايف عليها أبدا وأنا بعيد عنها

وأنتي كمان قدري خوفه عليكي دا وحبه ليكي وساعديه في أنه ينفذ أصح وأجمل قرار أخده في حياته وطمني قلبه وقوليله :

وأنا كمان أخدت القرار ولازم نسيب بعض عشان ربنا يبارك فى علاقتنا ويجعل آخرها الأرتباط ويجعل حياتنا اللي جايه كلها سعادة وحب .. لو ربنا مقدر هكون ليك بإذن الله وأنا كلي أمل في ربنا .. وبإذن الله مش هرتبط بحد غيرك ومستنياك ..

بس أنت شد حيلك فى دراستك واسعى وإبنى مستقبلك عشان أكون فخورة وأنا بتكلم عنك مع أهلى .. وصدقنى طالما إحنا خلينا رضا ربنا قبل رضا نفسنا .. فصدقنى ربنا هيتولى أمرنا ومش هيفرقنا أبدا ...

أستودعك الله الذي لا تضيع ودائعه

اقطع كل علاقتك بيها تماما.. وانتي اقطعي كل علاقتك بيه تماما..

ومن هنا إن شاء الله تكون البداية فى الرجوع إلى الله سبحانه وتعالى وبجد نقولها بأعلى صوتنا

قـــلبي ملك ربــي و ربـــي حبيب قلبــي
وحبــي لله اشد