رسالة من حبيبتي حلقتين يومياً

رسالة من حبيبتي حلقتين يومياً

السلام عليكم ورحمة الله وبركاته
..................................

أعز الناس
على طول الحياة نقابل ناس
ونعرف ناس ونرتاح ويا ناس عن ناس
وبيدور الزمن بينا يغير لون ليالينا
وبنتوه بين الزحام والناس ويمكن ننسى كل الناس
ولا ننسى حبايبنا أعز الناس حبايبنا أعز الناس حبايبنا
سنين وسنين تفوت ما نحس بوجودها ولا وجودنا
ولحظة حب عشناها عشناها نعيش العمر تسعدنا
ومين ينسى ومين يقدر فى يوم ينسى ؟ شعاع أول شرارة حب
ونظرة من بعيد لبعيد تقول حبيت ورمش قول غلبني الحب غلبني
ومين ينسى ومين يقدر في يوم ينسى
ليالي الشوق ولا نارها وحلاوتها
ولا أول سلام بالإيد ولا المواعيد ولهفتها
ولا ننسى ولا نقدر في يوم ننسى
حبايبنا أعز الناس حبايبنا
حبيب قلبي وروح قلبي حياة قلبي
يا أغلى الناس يا أحلى الناس يا كل الناس
لسه مشوار الحياة شايل لنا وقفات
معالم فى طريق الحب أحلى كتير
من اللي فات من اللي فات

....................................

لم أجد أرق من كلمات هذه الأغنية
لتكون مقدمه للقصه التي سوف أطرحها
بين أيديكم هذا اليوم

القصه بعنوان " رسالة من حبيبتي "
وهي قصه رغم إنتقادي لبعض أحداثها
ولكنها في المجمل تبعث في قلوبنا بعض مشاعر الحب
والإخلاص والتضحية التي ربما إندثرت وسط مشاكلنا
وحياتنا
أترككم مع القصه التي هي عبارة عن 24 حلقه
أنقلها إليكم
وأرجو أن تنل إعجابكم
ولكن رجاءاً
أرجو منكم عدم الرد حتي تكتمل القصه
وذلك محافظةً علي تتابع الأحداث

و أترككم مع الحلقه الأولي ................

الحلقه " 1 "

مامى كلمتنى النهارده و انا فى الكليه و قالتلى ان محمد ابن طنط انعام و انا مش عارفه محمد و لا حتى طنط انعام جاى الليله عشان يشوفنى و يتقدم لى
عشان كده مامى قالتلى ما اتاخرش فى الكليه اوى و ارجع بدرى عشان العريس جاى الساعه سبعه و الحق اجهز
مش عارفه اول مره ييجى بيتنا عريس يتفرج
رغم ان اخواتى البنات متجوزين
يمكن عشان كل واحده فيهم كانت مرتبطه بعريسها قبل الخطوبه و كانت مجية اهله عندنا مجرد شكليات
انما انا طول عمرى رافعه شعار لا للارتباط
قولو على عسكرى بقه اى حاجه
لكن انا كنت شايفه انى لازم انتظر النصيب و ما فيش حد من اللى كانو عايزين يرتبطو بيا شكله نصيب خالص
شكلهم كلهم ناس عايزه تتسلى و انا مش بتاعة تسالى
المهم روحت و لقيت الشغاله قاعده تلمع فى طقم الفضيه الشهير و مامى بنفسهابتطلع طقم الشاى النوريتاكى من البوفيه لحسن البنت تدشه و الاستعدادات شغاله على ودنه
مامى : نعم يا حبيبتى
شيرين : مين محمد ابن طنط انعام و عرفنى منين
مامى : ما يعرفكيش يا حبيبتى و لا طنط انعام كمان دى واحده صاحبتى لسه متعرفه عليها النهارده الصبح هاها
شيرين : اي ده يا مامى احنا حانهذر ازاى يعنى النهارده الصبح
الام : و الله كنت عند الكوافير قابلتها هناك و بعدين عبده سالنى عن و راحت هى داخله فى الكلام و سالتنى عندى بنات ولا لاه
قلت اه عندى الدكتوره شيرين فى اعدادى صيدله قالت لى طيب ممكن نتعرف عليكم عشان انا عندى ابنى ماشاء الله عليه مهندس بترول فى السويس و ما بيجيش الا كل اجازه و هوه هنا و عايز يشوف بنتك
شيرين : يعنى من غير اى اساس كده يا مامى دى حتى ما تعرفش احنا مين و لا عيلتنا و لا اى حاجه
الام : لا ماهو واضح ان الكوافير كان مضبط معاها المعاد و قايلها علينا ده هوه اللى كلمنى النهادره و اصر انى لازم اروح عشان عنده كريمات جديده روعه

شيرين : ماشاءالله ده كمان خاطبه

الام : يعنى اهو وسيله الناس تعرف بيها بعضها و مش حانخسر حاجه

شيرين : خلاص يا مامى انا حاجهز و اجرب الموضوع ده هاها
انا حاسه انى داخله انترفيو فى الجامعه ربنا يستر بقه و ما فضحكوش

الام : لا انشاء الله تعدى على خير
و جاء العريس مع امه فى الميعاد تماما

كويس انا احب المواعيد الكويسه
بس كان جايب شكولاته كوفرتينا
انا بقه ما بحبش شكولاته كوفرتينا دى

طلعت قعدت مع الناس و انا حاسه انى داخله على جهاز اشعه مش على انترفيو بس يعنى طنط انعام قعدت تقيسنى من فوق لتحت بالقلم و المسطره
و هى بتبوسنى حضنتنى جامد اوى مش عارفه ايه السبب و كان فاضل بس تطلعلى البندقه اكسرها بسنانى
بصيت للعريس و قعدت استنى تحصل حاجه زى اللى باسمع عنها فى الافلام و القصص
ما حصلش اى حاجه و لا كهربا و لا اى حاجه
بس الظاهر هوه حصل عنده عشان كان مش على بعضه خالص و عرقان ع الاخر
رغم ان الجو كان جميل

حكالى عن ظروفه و انه قاعد فى السويس عشان الشغل و ان مرتبه كويس و انه عايز عروسه تعيش هنا و تستناه لما يرجع من اجازته كل خمستاشر يوم
كل ده و انا عماله افكر

يعنى الواحد بيتولد و يفضل مع اهله من قديم الزمان لكن ينفع يختار اهل كده مايعرفهمش و يعاشرهم لحد اخر الزمان معقول

المهم القعده خلصت انهم اعجبو بى خالص و انه نفسه ييجى تانى بكره لوحده من غير مامته يقعد معايا شويه

مامى وافقت و ودعناهم و نزلو
و بعد ما نزلو مامتى سالتنى ايه رايك
قلت لها يا امامى ده انا باخد وقت اطول من كده عشان اانقى فستان عايزانى انقى عريس كده فى ساعه سيبنى افكر لحد بكره

عدل حسام من رباط عنقه و تاكد من وجود اوراقه فى مكانها بالحقيبه قبل ان يذهب لتناول الافطار مع والدته
الام : صباح الفل يا حبيبى انت نازل بدرى النهارده

حسام : ايوه يا ماما ادعيلى احسن النهارده اول مره ادخل سكشن و اشرح

الام : داعيالك يا حبيبى و انت قدها و قدود و تاكد ان ربنا مش حايضيع تعبك يعنى معقوله المذاكره و الاجتهاد ده كله و اول دفعتك خمس سنين و تقلق من شويه عيال فى اعدادى صيدله لسه جايين من المدارس الثانوى امبارح

حسام : الطلبه بتبقى عندها ميزان حساس بصرف النظر عن سنها بتوزن بيه المدرس
الام : و انت ان شاء الله تكون من الناجحين الموزونين ان شاء الله و اشوفك عريس يا بنى يا رب

حسام : ماشى يا ماما عايزه حاجه انا نازل

الام : خليك كده كل ما نجيب سيرة الجواز تتهرب

حسام : لسه يا ماما ما لقتش واحده تخطفنى و تخلينى احس انى لازم اقضى عمرى معاها

الام : يا حبيبى انت حاتتقدم و يحصل تعارف و بعدين ان شاء الله يحصل القبول ، انا كبرت فى السن و نفسى اطمن عليك قبل ما...............

حسام : ربنا يخليكى لى يا امى ، نتفاهم بعد ما ارجع يا حبيبتى عشان انا لازم انزل سلام
و قبل حسام امه و نزل و هو يفكر فى كلامها , هل من الممكن ان يتزوج بهذه الطريقه
ان يختار شريكة عمر وحياه لمجرد ان اهلها ناس طيبين و انها حلوه و ست بيت بشهاده الشهود
لا احد يعلم ماذا يخبئه النصيب لكنه دائما يستطيع ان يتمنى التوفيق من الله
دخلت شيرين الكليه ساهمه و سالتها منال صديقتها :
منال : انتى مش طبيعيه النهارده يا شيرى
شيرين : ايوه انا قلقانه اوى امبارح جالى عريس

منال : مبروك و اللى يجيلها عريس تقلق دى تفرح

شيرين : ما هو انا ما حستش اى احساس بيه و خايفه اظلمه يعنى بس اعمل ايه

منال : يعنى هوه لازم يكون حب من اول نظره

شيرين : ما قصدش حب من اول نظره لكن ع الاقل ارتياح من اول نظره , وهو جاى النهارده تانى

منال : طيب اديله فرصه يمكن من تانى نظره
شيرين : مش عارفه انا قلقانه و مش مبسوطه و صليت استخاره امبارح و يعنى حاسه انى مش مرتاحه
دخل الطلاب الى السكشن و كان عددهم قليل بعكس المحاضرات فتوفرت لحسام الفرصه ان يراقبهم عن قرب
السعاده الممزوجه بالترقب و الطموح فى اعينهم و معها الفخر بالانتساب لكلية الصيدله فى جامعة القاهره العريقه لقد كان حسام احدهم يوما .ووفقه الله الى كل ما حلم به
و بدا حسام الكلام مع الطلبه و تعريفهم بمادته و بعد دقائق سمع قرعا على الباب
و ظهرت فتاتان متاخرتان عن الميعاد
و احتار ماذا يفعل هل يؤنبهما ام يتركهما تدخلان ام ماذا يفعل
ياه احداهما فى غاية الرقه و تبدو مثل الاطفال فى وداعتها و الثانيه متنمره و تنظر له بتحدى
ووجد نفسه يقول : ايه اللى اخركم عن السكشن
شيرين : متاسفين يا دكتور ما كناش لاقيين المكان
منال : معلش توهان اعدادى بقه
حسام : احنا حانهذر يا انسه اتفضلى بره انتى و هى
ايه يا حسام ليييه
لماذا طردتهما ده اول يوم , يعنى كل اللى كنت بتعترض عليه فى حياتك زمان فى الدكاتره بتعمله انت دلوقت لا حول ولا قوة الا بالله
و زاد احساسه بالذنب احمرار عينى الفتاه الطفله و اوشكت على البكاء
كان يريد ان يتراجع لكن هيهات خلاص دبح القطه و عمل سبع رجاله فى بعض يرجع ازاى ؟؟؟
خرجت البنتان فى هدوء و خلفتا له شعورا بالذنب لا يوصف
بعد انتهاء السكش بحث عنها بنظره فى كل مكان و لم يجد لها اثرا
كان يريد ان يصالحها لكن هيهات ............
شيرين : انا عمرى ما حد احرجنى كده ايه ده ليه كده هوه الناس دى ربنا لما بيديها سلطه ليه بس بتتجبر
منال : انا مش عارفه و الله ايه الالاطه بتاعته دى هوه ما فيش حد غيره حلو و شيك
شيرين : حلو و شيك ايه انتى كمان ،انا مش طايقاه و لا طايقه نفسى
و عادت شيرين الى المنزل منهكه ، و حزينه
ووجدت امها تذكرها بمقابلة المساء المرتقبه
يييه ماهى ناقصه اصلها .................................................. .............
بصى يا مامى انا مش حاقابل حد اعتذرى له لو سمحت باى حاجه
الام : ازاى يا بنتى احنا حتى ما خدناش نمرته و بعدين الناس تقول علينا ايه
شيرين : انا مش مرتاحه للموضوع ده و لا للشخص نفسه و مش عايزه اعلقه بى اكتر, يبقى من دلوقت احسن ارجوكى يا مامى ما تغصبيش على

الحلقة "2"

طبعا كالعاده انتهى النقاش بينى وبين مامى النهايه الحتميه الاكيده
طلعت هى اللى صح ...
و كانت وجهة نظرها
انى لازم اديله فرصه و اقابله تانى و لو مره واحده بس عشان هو ما يتعييبش و دخله ممتاز و وسيم و و و و
ماما مش قادره تفهمنى
الشراره ما انطلقتش بيننا
انا لما اشوف جوزى او اللى حايبقى جوزى حاعرفه
من وسط مليون واحد ان شاء الله حاعرفه
لكن يبقى قاعد على كنبة الصالون و ما اقدرش اتعرف عليه يبقى اكيد مش هوه ده
و جاء محمد فى موعده و معه شنطة هديه كبيره نسبيا و اعطاها لى
يا عم ما تزودش احساسى بالذنب بقه انا عماله احاول مش نافع خااالص
و بعد الشاى و الجاتوه و المقدمات
تكلم معى عن عمل المرأه وانه ممكن ما يوافقش عليه عشان انا حلوه اوى ( على حد قوله ) و حايخاف على حتى انى اخرج من بيته
بيتك مين يا عم هوه انا اعرفك
و كمان عن الست والدته و فضلها عليه و ان هى اللى قعدت تدور لحد ما لقتنى
و شويه كلام مديح كان بيقطع فى عشان انا كنت حاسه خلاص انى اتخنقت
الرسول عليه الصلاة و السلام قال : انظر اليها عسى ان يؤدم بينكما
و انا مش شايفه انى قادره اتواصل معاه و مخنوقه منه من غير سبب و بعدين انا مصليه استخاره كذا مره من امبارح يعنى لو كان خير كان زمانى قابلاه
و انتهت المقابله وانا على قرارى لن اراه مره اخرى
حرام اجازته صغيره و انا بذلك اضيع عليه فرص اخرى ممكن ان تفوته
كمان هو صعبان على لسبب ما انا مش عارفاه
و خايفه يحس انه فيه عيب او حاجه
لكن الحقيقه هو ما فيهوش عيب
مجرد عدم ارتياح و بس
وبعد مانزل قلت لمامتى و لبابايا كمان ان خلاص ما فيش امل و انا مش قادره اتواءم مع فكرة انى اقضى معاه عمرى كله
و مامى قالت لى خلاص يا بنتى لما يكلمونا تانى نبلغهم بصنعة لطافه كده و خلاص
دخلت الاروبه ندى بنت اختى الصالون و فتحت كيس الهديه و طلعتها و لما شفتها صرخت :
اتفرجى يا مامىىىى
ايه يا بنتى ردت مامى
شفت محمد جايبلى ايه طقم شاور جل و كريم و صابونــــــــــــــاه
طب ليه كده ده انا حتى لسه مستحميه النهارده الصبح فكرك لاحظ اى حاجه يعنى هاهاهاا
و راحت أمى هى الاخرى فى نوبه من الضحك و هى لاتصدق هذه الهديه
صحيح انه ماركه معروفه و ممكن يكون غالى و متهرب كمان من السويس
بس دى هديه حتى ما يجيبهاش واحد لمراته اللى بقالها عشرين سنه على ذمته
و بعدها اتصلت طنط انعام و الده محمد لتسال عن امكانية حضورها هى و ووالده و اعمامه و كده عشان يقرو الفاتحه
و لم تصدق طنط انعام نفسها عندما علمت برايي و كان ابنها جوهره و لا يمكن حد يرفضه و بعد محاولات مستميته للكلام معى
تمكنت امى الحبيبه من اقناعها بعدم جدوى المحاوله
و عندما تاكدت طانطى انعام . طلبت من ماما الهدايا
يا نهار ابيض هدايا ؟؟ دى هى هدية واحده بس . ردت طنط انعام و ما تنسيش الشكولاته
و لما سمعت كده قلت ده و الله يستاهل الصابونااااااااه
سبحان المنجى من المهالك انا كنت حاتجوز واحد عايز علبة الشوكولاته تانى
و يا ريتها باتشى و جواهر
ده كوفرتينا يعنى كان مصيرها ام سيد الشغاله تاخدها
و قمت من فورى و صليت صلاة شكر عميق لله
ياه فات اسبوع على طردى من السكشن و كنت باتحاشى اقابل اللى اسمه د. حسام ده باى طريقه حتى لما كنت اشوفه فى الكوريدور كنت باعمل مش واخده بالى
كرامتى يا ناس اتبعترت
و كان السكشن ده عملى و تشريح كمان و دخلت السكشن و لقيت الدكتور حسام باصصلى اوى و مركز معايا
فيه ايه بس يا عم ابعد عننا بقه ادينى جيت اول واحده اهه
و ياريتنى ما جيت اول واحده
كان في ضفدعة متشرحة من السكشن اللي قبلنا وفجاة قامت تنط وهي بطنها مفتوحة و حاجات طالعه من بطنها كتير كده
فجاه لقيت الاصوات كلها بتبعد وصوت وش جامد و الوان داخله فى بعضها
و قلت لنفسى استنى كده يا بت جايز ما تقعيش
لكن للاسف تقريبا وقعت
أغمي علي..
و بعد فتره لا يعلمها الا الله لقيت نفسى فى غرفة المعيدين بعيدا عن رائحة الفورمالين فى السكشن و داده من الكليه ماسكالى كباية ميه و بسكر
واغرب منظر ما توقعتش اشوفه ابدا
د. حسام واقف قدامى مذهول و الدموع فى عينيه و ..................... يتبع

الحلقة 3

النهارده رايح السكشن الصبح و انا بافكر فى طريقه اراضى بيها البنات اللى طردتهم المره اللى فاتت
انشاله حتى اعيدلهم الشرح لوحدهم و فجاه لقيت واحده منهم قدامى
و فجاه لقيتها ماسكه دماغها و عماله تترنح و فى ثانيه وقبل ما تقع ع الارض كنت ساندها
ايه الاحراج ده
الطلبه دخلو على لقونى ماسكها عشان ما تقعش و عمال انادى على الداده عشان اخدها بره بعيد عن الفورمالين
و مر وقت و انا باحاول ارش علي وشها كولونيا لحد ما بدات تفوق
سبحان الله ملاك يا ربى
ايه ده يا عم حسام اجمد
يا دى الاحراج فاقت وانا عمال ابحلق فيها ...
ياخبر
ايه العينين دول ؟
دى عينيها زرقه رغم انها خمريه و شعرها بنى

ما شاء الله لا قوة الا بالله !!!!!

تقريبا كان شكلى اخر هبل لانها بمجرد ما شافت وشى قامت مفزوعه و لمت حاجتها و مشيت من غير و لا كلمه
طيب بالنسبه للشخص اللى شال و تعب ده ما فيش اى شكرا .....
لا حول ولا قوة الا بالله !!!!
منال : حمدلله على سلامتك يا شيرى ايه اللى حصل يا بنتى
شيرين : انا اخر حاجه شفتها ضفدعه بتنط و كل حاجه واقعه منها و بعد كده ما درتش ...........

منال : الا و دكتور هيركليز شايلك

شيرين : ياخبر معقول ..... شالنى يا دى الفضايح

منال : مش شالك اوى يعنى هوه سند سعادتك كده و لما دخلو الطلبه كان حيرميكى من كسفته تانى فى الارض لولا انا و البنات سندناكى

شيرين : ده انا قليلة الذوق اوى انا حتى ما شكرتوش
كل اللى عملته لما شفته قدامى انى قمت جريت ...
منال : انت حاتفضلى طول عمرك قفل كده
شيرين : المره الجايه لما اشوفه حاشكره ان شاء الله
و خطت شيرين نحو سيارتها لكن كانت هناك عينان تتابعها من فوق
حسام : دى راكبه بى ام . دى بنت مين فى مصر دى
د.اشرف : دى يا سيدى بنت هشام الحديدى رجل اعمال و صاحب شركات و فنادق و بلاوى
حسام : و انت عرفت منين يا اشرف
اشرف : مانا اعرف جوز اختها الكبيره دكتور طارق معرفه شخصيه هوه كمان والده صاحب شركة ادويه و كنت ناوى اشتغل معاه قبل ما اتعين معيد فى الجامعه بس ايه عيله سقع و ابوها مش مخلى حد من بناته عايز حاجه

و فى طريق عوده حسام فى المنزل لم يستطع منع نفسه من التفكير فى شيرين التى كان قد عرف اسمها اخيرا
يعنى ابوها مليونير و جوز اختها صاحب شركات و انت تيجى ايه يا صعلوك عشان تفكر فيها
الله يرحمه ابوك كان موظف على قده و لولا انه سابلك العربيه دى اللى جابها بعد معاناه كنت زمانك راكب الاتوبيس زى غيرك و ما كانش حيلتك غير شطارتك و بس
و لولا مامتك و تشجيعها ليك طول عمرك كان زمانك ولا حاجه , دى فاكره ان العرايس حاتتحدف عليك عشان الشهاده و الشقه الايجار القديم بتاعتك
يعنى معقوله واحده زى شيرين دى ترضى تقعد مع امى فى شقتنا ...

ايه الكلام ده يا حسام انت زى ما يكون اتقدمتلها خلاص و فاضل موضوع الشقه ؟؟!!! اهدا كده الله يهديك
و فى اليوم التالى ذهبت شيرين لمقابله حسام فى مكتبه و هى تقدم رجلا و تؤخر الاخرى من الخجل
نظر اليها حين دخلت الغرفه و رفرف قلبه من السعاده ثم لاول مره بدا يلاحظ ملابسها و حذاءها المتناغم مع الحقيبه الجلديه و عطرها الرائع و النظاره الشمسيه التى تجمع بها شعرها من الامام
وللعجب تضايق ...
احس انها اقوى بغناها ومركز والدها ...
شيرين : صباح الخير يا دكتور حسام
حسام : صباح النور اى خدمه
شيرين : بس انا اسفه انا مشيت من غير ما اشكر حضرتك و البنات قالولى .....ا
رد حسام باقتضاب دون ان يرفع عينيه عن اوراقه : العفو ما فيش حاجه
شيرين : انا بس قلت واجب اشكر حضرتك و حامشى مش حاعطلك عن اذنك
وهمت ان تستدير لتمشى فقام من مكتبه قائلا :
انسه شيرين انا برضه عايز اعتذر عن يوم ما طردتك من السكشن و لو عايزه اشرحلك اللى فاتك ممكن

شيرين مبتسمه : يا ريت احسن حقيقى مش فاهمه حاجه فى الاناتومى بسبب السكشن اللى ما حضرتوش ده
حسام : خلاص بكره انا ما عنديش سكاشن ممكن تيجى الساعه اتناشر لو فاضيه اشرحهولك
شيرين : اوكى اتناشر مناسب اوى و لو ممكن منال تيجى معايا
رد عليها من تحت اسنانه : اه طبعا امال ايه تتفضل
و بعد قليل فى الكليه ................
شيرين : انا اتفقت مع د. حسام بكره يشرحلنا السكشن اللى فاتنا
منال : ايوه يا عم ماشى يا ستى
شيرين : انتى مش حاتيجى معايا و اللا ايييه
منال : طبعا لاه انا ما حبش اكون عزول ابدا و بعدين خالد بكره حاييجى مخصوص يقابلنى عشان هوه ماعندوش سكاشن خالص اكسفه يعنى ؟؟
شيرين : انا مش مرتاحه لخالد ده يا منال نظراته كده مش عاجبانى ابدا
منال : يا بنتى كل الشباب بتبص سيبك انتى ده دمه خفيف اوى
شيرين : ربنا يستر بس احنا جايين نتعلم مش نستخف دمنا و ده عايد السنه انا خايفه ياثر عليكى انت طول عمرك شاطره
منال : و حافضل شاطره برضه ياستى ساعه لقلبك بقه و بعدين مانتى كمان رايحه اهه تقعدى مع الجو
شيرين : من فضلك يا منال انتى صاحبتى بس بلاش الكلام ده احسن و الله ما تكلمش معاك.
منال : بس بس انت اتحمقت و وشك احمر ليه كده خلاص يا ستى انا باهذر معاكى
و فى اليوم التالى وجدت شيرين نفسها تستهلك وقتا طويلا فى الوقوف امام المراه اكثر مما تعودت و تنتقى ملابسها بعنايه اشد من كل يوم لكنها لم تثقل من الماكياج اذ لم تكن بحاجه اليه
انها جميله و هى تعلم ذلك لكنها ابدا لم تكن مغروه بهذا الجمال .

و ذهبت للمكتب قبل ميعادها بدقائق و انتظرت بالخارج و اثناء انتظارها لفت انتباهها دخول فتاه من دفعة السنه النهائيه كانت راتها سابقا ، دفعها الفضول لتنظر من الباب
قالت الفتاه بصوت عال : ازيك يا حس ، كبرت علينا انت يا مان
فوجئت بها تسلم بحراره على حسام و هو يبادلها السلام بقلق و ينظر حوله كانه يخاف ان يراه احد
.................يتبع

الحلقه الرابعه

فكرت شيرين :
هوه انا بحب حسام و اللا ايه ؟؟
ايه اللى ضايقنى اوى لما لقيت واحده بتسلم عليه و بتدلعه وتقوله يا حس انا مالى اساسا
طب هوه كمان كان مكسوف اوى و متضايق ليه
لأ هو معيد و له مركزه و ممكن ما كانش عاوزنى اشوف حد كده واخد عليه انما انا ...........
ايه يا شيرين تكونشى هى دى الكهرباء
انا بس بطنى بتوجعنى و باحس انى راكبه طياره بتهبط كده كل ما اكون رايحه اشوفه
هوه الحب بييجى فى البطن و اللا ايه ؟
بس بافرح لما باشوفه اوى

والحمد لله ان البنت دى كانت مجرد زميلته فى الدفعه سنتين قبل ما تخيب و تسقط و شكله مش طايقها كمان ، كان باين كده على و شه و هو بيفسرلى تصرفاتها
بس ليه هوه كان مهتم اوى يقولى انها مجرد زميله
هوه بان على انى انا غيرانه و اللا ايه
بس الحمد لله ما فهمتش اى حاجه فى الاناتومى برضه
يمكن اضطر بقه اخد درس عنده و خلاص ..........
بس هوه بيشرح حلو حسيت كده يعنى من اخلاصه بس انا كنت مشغوله بيه هوه ..........
ايديه .......زى الفنان الراجل فعلا بيبان من ايديه .......
و عينيه .....
ليه لما بيبصلى مش بحس انه بيبص على زى كل الناس
لا بحس انه بيبص جوايا و ما بقاش قادره احول نظرى عنه و لا حتى قادره ابص له
يمكن هوه ده الحب اللى طول عمرى اسمع عنه بس من غير ما اجربه .............

فكر حسام :
مش ممكن الزفته اللى اسمها هند دى ... انا مش مصدقها حقيقى يعنى
انا مشفتهاش من سنه تيجى كده زى القضا فى نفس معاد شيرين
هوه انا بحب شيرين و اللا ايه , ليه كنت خايف اوى تشوف هند عندى ..........
بس هى بتغير و اللا ايه ؟ لا ما عتقدش دى بس ممكن تضايق عشان اديتها معاد و لقتنى مشغول
انا حاسس انى ما عرفتش اشرح لها و لا كلمه , متلخبط و كل ما ابص لعينيها الاقى حاجه تشدنى و اتلخبط زياده و اتوتر ليه
ممكن يكون ده حب ؟؟
دخلت شيرين الى المنزل هائمه و قبلت امها ثم رن جرس الهاتف
منال : ايه الاخبار يا شيرى
شيرين : كنت فين يا منال طول النهار انت مش قلتى خالد جايلك الكليه النهارده ؟
منال : لا مانا خرجت انا و خالد شويه بره الكليه ناكل ايس كريم
شيرين : خرجت معاه ؟ فى عربيته ؟؟
منال : ايوه و فيها ايه مش زميلى
شيرين : بصى يا منال احنا طول عمرنا كنا فى مدراس راهبات و كنا بنات بس ،
لكن ده مش معناه ان اول مانشوف الولاد نتهبل و ننسى نفسنا افرضى باباكى او حد من اخواتك شافك
منال : هاها ها من نعم ربنا علينا ان القاهره واسعاااه ما تخافيش انتى بس ده احنا ما قعدناش ساعتين على بعض
شيرين : انا خايفه عليكى يا منال هما الساعتين دول شويه يعنى ربنا يسترها
منال : المهم انتى عملتى ايه النهارده مع حسام شرحلك السكشن ؟
شيرين: ايوه و ما فهمتش حاجه دى ماده صعبه اوى ماتيجى ناخد درس
منال : اه طبعا ماناخدش ليه بكره اروحله المكتب و اطلب منه يدينا درس
شيرين : صحيح يا منال ؟ وناخده عندى فى البيت ايه رايك
منال : طبعا يا ست هانم ما طول عمرنا بناخد عندكم فى السرايا يعنى حناخد فين يعنى ّ!!!
و فى اليوم التالى ذهبت منال لمكتب حسام
منال : صباح الخير يا دكتور
حسام : صباح النور يا انسه
منال : و الله انا كنت بس عايزه اتفق مع حضرتك على درس عشان احنا مستصعبين الماده شويه
حسام : انا مش بادى دروس يا انسه شوفى حد تانى فى القسم
منال : لييه بس يا دكتور ده حضرتك اللى بتدرسلنا فى السكشن و احسن ناخد عندك عشان يبقى الكلام واحد و ما نتلخبطش و بعدين ده شيرين حاتزعل اوى اوى
حسام و قد لمعت عيناه : شيرين ؟؟
منال : ايوه مانا وهى حاناخد مع بعض عندها فى البيت لو ما عندكش مانع وممكن نبدا بكره
حسام : وهى ما جتش معاكى ليه
منال : اصلها تعبانه النهارده و ما جتش مامتها قلقت عليها من ساعة ما اغمى عليها و خدتها للدكتور النهارده
حسام : الف سلامه عليها خلاص نبدا الاسبوع الجاى يوم السبت ان شاء الله ممكن العنوان
منال : ثوانى و اكتبه لحضرتك هوه و التليفون عشان لو فيه اى تغيير . و شكرا يا دكتور الف شكر

ثم على الموبايل
منال : تمام يا فندم السبت الجاى ان شاء الله حايكون عندك فى البيت
شيرين : وافق بسهوله كده
منال : لا مش بسهوله وافق لما عرف ان حضرتك حتاخدى معايا مش قلت لك فيه حاجه و النبى يا ريت ده الواد زى القمر يا شيرين طول بعرض و بنات الكليه كلها حاتتجنن عليه و على عنيه الواسعين دول !!!
شيرين : و بعدين بقه يا منال فى الكلام ده باى باى بقه اشوفك بكره

صح هوه زى القمر و طول بعرض و حنين اوى ده عيط عشانى , لا و صوته , من الاخر انا باين كده بحبه
عمرى ما حسيت بحد الاحساس ده
عايزه اشوفه اوى و خايفه اشوفه و كل ما افتكره احس بالطياره بتنزل و بطنى توجعنى و النبى ليه ما حدش من اللى اكلمو عن الحب حذرنا من حكاية البطن دى ؟؟؟

معقول حاشوف شيرين يوم السبت فى بيتها ! و حاديها درس كل سبت ؟ انا مش عارف البنت دى عملتلى ايه ؟ ده انا رفضت اى درس جالى قبل كده اشمعنى ده
عشان شيرين , انا باين بحب شيرين
لا مش باين انا اكيد بحب شيرين
ممكن اكلمها فى التليفون ...، نفسى اطمن عليها انا كمان
بس اكلمها اقولها ايه ؟
مش مهم انا حاكلمها و خلاص
حسام : الو انا دكتور حسام استاذ الانسه شيرين فى الجامعه اقدر اكلمها
الشغاله : لحظه يا فندم اندهلها ..... انسه شيرين د. حسام عايز حضرتك
شيرين : بتقولى مين .........................؟؟؟؟